Advice Father to Minang Son

    Minangkabau bukan hanya sebatas teritorial, sebatas budaya, sebatas kesukuan, atau sebatas demografi. Namun Minangkabau adalah sesuatu yang kompleks, artinya Minangkabau itu suatu kesatuan yang terdiri dari sejumlah bagian, dari setiap bagian dari Minangkabau memiliki bagian yang saling berhubungan dan saling tergantung satu sama lain.

     Oleh karena itu kekuatan atas keberadaan, Tak Lapuak Dek Hujan - Tak Lakang dek Paneh menjadi kekuatan sistem yang ditata sedemikian rupa oleh leluhur di Minangkabau. Perumpamaan tersebut lahir dari sikap menjalankan sistem, sehingga sistem itu memiliki ruh yang mampu bertahan selayaknya makhluk hidup.

     Dari sekian banyak tatanan yang ada di Minangkabau, diantaranya yang terus hidup adalah nilai-nilai yang diteruskan dari generasi kegenarasi, banyak pula wujud dari nilai-nilai tersebut, salah satu diantaranya sesuatu yang tidak hanya sebatas nasehat, itulah dia yang dikatakan Pitaruah.

     Dibawah ini adalah "Pitaruah Seorang Ayah Kepada Anaknya Tentang Bagaimana Baiknya Menentukan Pilihan Untuk Menentukan Teman Hidup".

Oiii nak kanduang si biran tulang...

Luak hati limpo nan bakuruang, 
ubek jariah palaraih daman siang jo malam, dingin tampa di kapalo, 
kamari-mari la nak duduak, ado rundiangan nan Ayah sampaikan.


Kalau diliek di pandangi nak, 
dicaliek umua nan tapakai, badan ayah batambah tuo, kini manjalang ka anam puluah.


Tagolek di liang lahat sakapa tanah patupangan, badan maheriang ma adok ka kiblat, dibateh papan nan saalai, 
badoroh tanah panimbunan tagak mejan nanduo, manjalo tijung hitam, 
do'a di baco pangabisan.


Tujuah langka mayaik di kubuah nak, datang malaikaik pai batanyo, 
tapi jan tanyo nan ka tajawab, usah dak'wah nan ka tabandiang, 
utang ka anak nan takana kasiah tagayiang alun sampai.


Hanyo pitaruah nan batinggakan itu banamoh pitaruah ayah, itulah tando kasiah sayang. Utang nan nyato bakek anak kini-kini ayah lansaikan.
Danga lah anak kanduang, 
simak lah nyato-nyato : 
satitiak jan dilupoan, sabarih jan nak hilang, ganggam arek pacikan taguah, siang jadikan lah tungkek, 
malam jadikan suruah padoman patang jo pagi. Lamak dek awak katuju dek urang, kok raso di baok turun kok pareso dibaok turun, 
itu timbangan urang nan babudi, santano budi nanlah pupuih nak.alam sampik langka tatumbuak sulik batenggang bakalakang, badan disisia urang banyak.


Dangalah pantun urang dulu : 
dek ribuik rabahlah padi..
di upak datuak tumangguang, kalo iduik indak babudi, duduak tagak kamari cangguang, babelok babilin-bilin, bak cako padi ka tabik, 
dek elok urang tak ingin, 
dek baso urang nan garik.


Kini-kini ayah sampaikan : 
hati-hati mancari jodoh, jan tasuo bakato urang, babaju basungguah lusuah katak-katak dilangan, nan buliah mangko ka rusuah mandapek raso kahilangan, salero katuju di nan lamak, 
mato condong ka nan rancak itu biaso dalam hiduik ma nak, mako carilah nan elok rupo manih dipandang, 
ubek jariah palaraih payah, 
pamenan mato siang jo malam, baitulah cari bini ka dibaok ka rumah tanggo.


Satantang mamiliah parampuan nak, ado 6 nan ka dipandang manulah wajah :
nan partamo rancak ruponyo

kaduo mamiliah bansonyo

katigo banyak haratonyo
kaampek tinggi sikolahnyo

ka limoh haluih buddinyo

nan ka anam ta'at agamonyo.


Carilah sabalik kampung yung, 
pareso bilang nak nagari dak mamiliah baniah ka tampang, nan rupo rawiknyo rancak
,
kok kuniang putiah barasia
,
kok hitam mnih hitam manjalinok,
gadang nan indak gadang bana,
kok gapuak tangguang,
kok kuruih tak jadi
langkahnyo tagonyek-gonyek, 
lenggoknyo cando baukuah
 caliak taluang pandang mandanyuik
 pado galak sengeang balabiah 
indak basikek manih juo.


Kok tidak basuo nan sado nantun, diantaro nan anam nan ka dicaliak, usah tatumpuh ka nan ampek, 
tapi utamokan nan duo macam yaitu : budi jo agamo, sabab akibaiknyo nak, rancak rupo dak baiman, 
itu pangkah cilako dalam kampuang, manggata dalam nagari, buliah banso babudi indak congkak takabuah dalam nagari, 
itu urang nan dijajok sabalik kampuang.


Kok dapek mamiliah jodoh, nak usah nan kayo rayo bana nak, 
tapi satingkek beda salisiah diateh awak sabanang.
Kok lai bagian samo bansaik, 
bajaso tiok baragiah, tau basukur jo nan ado, 
tapi kalo jo nan kayo kamari bedo, diseokan rumah sapetak, elok lah gudang urang gaeknyo, dipadia nyo mangontrak.
kunun polo mambali rumah, wak la nyato urang manumpang, 
raso tajajah layia batin.


Bakato nabi nak, 
di baok jo bahaso awak kiro-kiro co iko buniny nak : 
ado ampek kriteria ciri-ciri istri yang tauladan, mak nan ampek yaitu :

bilo dipandang hati wak sanang,
apobilo nyo disuruah nyo capek pai,
apobilo di bayia gadang hatinyo,
apobilo tapisah elok laku.


Sabaliaknyo pulo nak, 
tando-tando istri nan cilako :
nan partamo 
panampilannyo mantuak cilutu samak-samak mato mamandang 
badan kumuah rambuiknyo kusaw bakain indak sandereh, muko kasam suko pamudaik, katiaknyo babaun patuih,
nan ka duo 
kalo disuruah nyo pambantah 
asa dilarang dilangganyo
 di ajai mantuak rang cadiak 
namuah batangka bakaruak arang badebat batagang mayiah ciek di awak saribu dek inyo
,
nan katigo
 kandaknyo barapi-rapi mamintak tiok sa ganyek, dak paduli di muko urang 
tapi dibalihkan nan murah abih di masak cacek, 
diagiah nan maha, daknyo rajan 
nan gadang tak badaso nan panjang dak nyo ajan 
awak talenga disembanyo,
nan pangabisan
 pangguntiang dalam lipatan, pamanciang dalam balango
panghianan sayie bana
di adoan candoh saulah, bapurak-purak indak tau, itu tando istri cilako.

Nak, itulah bunyi pitaruah ayah nak, tantang mamiliah parampuan untuak ka diambiak jadi istri.
 Nyampang kok tumbuah pertanyaan, baa caro manyalidikinyo, jawabnyo mudah sajo, masalah rupo jo rauik badan, bisalah dipandang lansuang, sawajah asa katurunan, kondisi ekonomi latar belakang pendidikan buliah batanyo informasi, batanyo kian kamari, basiasek bakeh kawannyo, tapi soal pribadi pambaoan, ataupun amal jo ibadah, bayangnyo nampak diparangai caliak korenah tingkah laku, sinan ka sahiah gambarannyo.

     Pitaruah Ayah ini disadur dari ceramah adat yang didokumentasikan lewat audio dan audio visual,

Oleh : Angku Yus Dt Parpatiah,
saya hanya mencoba mendokumentasikannya kembali dalam bentuk tulisan, semoga apa yang diinginkan dari niat disusunnya pitaruah ini dapat bermanfaat sebagaimana mestinya.

     Sebelumnya saya meminta maaf atas isi dari tulisan ini saya dokumentasikan ulang sesuai dengan bahasa aslinya, agar tidak mengurangi nilai-nilai yang terkandung didalamnya. Apabila teman-teman kurang paham, silahkan bertanya melalui komentar, InsyaAllah saya akan menanggapi semampu saya.